SA Graan Junie 2016

10 / 64

TERUGBLIK
NAMPO 2016 Spesiale
Junie 2016
8
NAMPO Oesdag 2016
troef verskeie rekords
Graan SA se 50ste NAMPO Oesdag het te midde van stram
landboutoestande meer as een rekord laat spat. Dié vier-
dag-handelskou, wat vanaf 17 tot 20 Mei naby Bothaville
gehou is, is deur ‘n rekord 75 116 mense bygewoon terwyl
‘n totaal van 685 uitstallers deelgeneem het – die meeste nog.
Die top-bywoningsyfer het alle verwagtinge oortref en positiewe
terugvoer van uitstallers het bevestig dat hulle goeie besigheid
gedoen het. Ideale weerstoestande het ongetwyfeld bygedra tot
hierdie uiters suksesvolle 50ste Oesdag.
Vergeleke met voorverlede jaar se 399 ligte vliegtuie en helikop-
ters wat oor die vier dae op NAMPO Park geland het, het die
getal vanjaar op 448 te staan gekom. Die vliegveld word deur
uitstallers, besoekersgroepe, private vlieëniers asook landboupro-
dusente gebruik.
Die gladde vloei van besoekers deur die hekke, ten spyte van die
groot bywoning, was opmerklik ná ‘n elektroniese toegangstelsel
verlede jaar ingestel is. ‘n Meer egalige verspreiding van besoekers
oor die vier dae het voorgekom. NAMPO 2016 het weer eens
bewys NAMPO Park se fasiliteite leen hom daartoe om ‘n groot
getal besoekers te hanteer. Positiewe kommentaar is ontvang oor
die gehalte van uitstallers, die goeie en skoon toestand van die
terrein en toiletgeriewe en die rustige atmosfeer en positiewe ge-
moedstemming wat deurgaans geheers het.
“Die NAMPO Oesdag het oor die afgelope halfeeu ontwikkel tot
‘n handelsmerk wat moderne landbou in Suid-Afrika akkuraat uit-
beeld. Dit spreek tot die algemene publiek as verbruikers van ons
landbouprodukte; dit spreek tot alle produsente in ons land; dit
spreek tot besluitnemers in regeringskringe en die bedryf; dit
spreek selfs tot die internasionale arena – en die groeiende
belangstelling uit die buiteland bevestig dit,” het mnr Cobus van
Coller, Oesdagvoorsitter, gesê.
Volgens mnr Jannie de Villiers, uitvoerende hoofbestuurder van
Graan SA, haal hy sy hoed af vir Suid-Afrikaanse landbouprodu-
sente se aptyt vir risiko. “Ten spyte van moeilike omstandighede
sien produsente steeds kans om in die bedryf te investeer. Hulle het
nie net NAMPO toe gekom om te kyk nie, maar ook om oordeelkun-
dige aankope te kom doen. Hulle gee vir ons mense hoop.”
‘n Ander aspek wat hy positief ervaar het, is die opgewondenheid
onder Graan SA se gaste wat die Oesdag vir die eerste keer besoek
het. “Senior mense in die strukture van landbouverwante besig-
hede het by NAMPO ‘n prentjie beleef wat die omvang en diepte
van die bedryf betref. Hulle terugvoer was sonder uitsondering
oorweldigend positief oor die beeld van ‘n mededingende, tegnolo-
gies-gevorderde bedryf,” het hy gesê.
Graan SA het tydens ‘n spesiale funksie erkenning gegee aan
uitstallers, vrywilligers, landbouleierskap en personeel se bydrae
tot die NAMPO Oesdag oor die afgelope vyf dekades sedert 1967.
Spesiale erkenning is verleen aan ses van die 1967-Oesdag se agt
uitstallers wat vandag nog uitstal, asook aan 17 uitstallers wat
onafgebroke sedert 1974 op die huidige terrein uitstal.
2016 se rekord NAMPO Oesdag was ‘n wonderlike afskeidsge-
skenk aan mnr Johan Loxton wat NAMPO die afgelope 20 jaar
bestuur het. Mnr Toit Wessels (tans ledebemarking- en kommuni-
kasiebeampte: Graan SA) sal vanaf 1 Oktober 2016 die leisels oor-
neem onder mentorskap van Johan.
Aanstaande jaar se Graan SA NAMPO Oesdag sal plaasvind van
16 tot 19 Mei.
JOHAN SMIT, besturende redakteur: SA Graan/Grain. Foto’s: ESTIE DE VILLIERS, ELMARIE HELBERG,
LOUISE KUNZ, HANNO SEEGERS en ADRI THERON, SA Graan/Grain-medewerkers
Graan SA het tydens ’n 50 jaar-geleentheid op Vrydag, 20 Mei, die
organisasie se oud-leierskap, NAMPO Oesdag-komiteelede, vrywil-
ligers, personeel en vriende van die Oesdag onthaal. Op die foto is die
landbouleierskap verantwoordelik vir Graan SA se NAMPO Oesdag oor
die afgelope bykans drie dekades. Voor: Vic Mouton (Oesdagvoorsitter
2001 - 2005), Jub Jubelius (Oesdagvoorsitter 2005 - 2011),
Cobus van Coller (Oesdagvoorsitter sedert 2011) en Johan Loxton
(wat as bestuurder: Kommersiële Dienste vir die afgelope 20 jaar aan
die stuur van die NAMPO Oesdag se organisering staan). Agter:
Jannie de Villiers (uitvoerende hoofbestuurder: Graan SA),
Japie Grobler (Oesdagvoorsitter 1987 - 1989) en Bully Botma
(Oesdagvoorsitter 1989 - 2001).
Spesiale erkenning is verleen aan ses van die 1967-Oesdag se agt
uitstallers wat vandag nog uitstal, asook aan 17 uitstallers wat onaf-
gebroke sedert 1974 op die huidige terrein uitstal. By die funksie was
personeel van New Holland SA, Argo, Barloworld Agri, Kempston Agri
(Claas), Eqstra (Deutz & Same), Shell, Syngenta, Rovic Leers, Pannar,
Senwes en Bessemer. (Nog foto’s van die funksie sal in die volgende
uitgawe van SA Graan/Grain gepubliseer word. – Red.)