SA Grain May 2017

74 / 76

72
Beste Grootneefsoos Buurman altyd sê: Arm en lelik is niks, maar onnosel...
Daarvoor is daar nie pille nie. Oral hoor jy van ‘n gerommel
en gerugte van rommel. Dit is nou nie Rommel in die noorde
van Afrika met sy Duitse offensief teen die Geallieerdes
nie; dit is rommel hier in ons eie Suidland. Hoe kom ons
weer uit dié jemblik? Voorwaar, elke paradys het ‘n slang.
Buurman vertel verder van al die rommel in Zim. Daar kan jy nou
skoolfondse met boerbokke betaal, omdat hul kontant op is. ‘n
Boerbok is op sy beste maar ‘n vloeibare belegging, want jy weet
nooit aan watter kant van die draad hy die volgende dag is nie.
Wat gaan die skole met al die bokke maak? Eersdaags is daar meer
bokke as kinders in die skole. En ‘n bok is ‘n blikskottel.
Buurman het ook laat weet dat die Reserwebank in Zim beroof is,
maar dat niemand die motief vir die roof kon bepaal nie. En as jy
op Air Zim se vliegmasjien klim en hulle vra oor “chicken or beef”,
gaan dit oor jou bagasie. En dat hul president
die Nobelprys vir Chemie gaan kry, want hy
het die Zim-dollar in bollie verander.
Só kan ons aangaan met stories oor ‘n land
en sy mense wat te lank in ‘n rommelhoop
vasgekeer was. Maar hoe tragies van ‘n eens
voerspoedige land, dat duisende van sy
mense nou oor die Limpopo vlug omdat hul
nie meer ‘n bestaan in Zim kan maak nie.
Hopelik kom ons Suidland betyds uit die
rommelstatus, voor die res van die wêreld
simpel grappies oor ons begin maak. Maar
nou ja, politiek en politici is die gevolge van
die sondeval.
Ou Neef, soos my barbier uit Marokko altyd
sê, “a happy wife is a happy life!” Ons moet in
hierdie moeilike dae fokus op dinge waaraan
ons ‘n verskil kan maak. Dit help tog nie om
jou te kwel oor wat die rand gaan maak nie.
Dié sal wel op- of afgaan, maar nie noodwen-
dig in daardie volgorde nie. Maar dit is dalk
‘n goeie tyd om daardie los skuldjies toe te
maak. Dit sal waarskynlik eers moeiliker gaan,
voordat dit beter sal gaan.
Sukkel julle ook so om geloodte petrol vir
die ou voertuie in die hande te kry, ou Neef?
Die rooi LRP-petrol raak nou so skaars soos
hoendertande. Ons het maar ‘n paar sinkers
in die ou bakkie se petroltenk gegooi, net om hom nog so ‘n
loodasempie met al die nuwe unleaded petrol te gee.
Buurman laat weet dat hul oor Paastyd rondgery het tot op Pater-
noster. Daar kuier hulle toe die een aand tot laat met die mense
van die kontrei. Synde uit ‘n ander geweste, vra Buurman sommer
bietjie uit oor die Weskus en oor die naglewe in Paternoster. “Nee,”
laat weet die man wat die wyne skink, “sy is vanaand op Yzerfontein!”
Ou Neef, so tussen die skete en pyn is daar tog altyd ‘n vonkel vir die
oog. Dit hang net af van die bril waarmee jy na die lewe kyk.
‘n Boereplesier wat wag is NAMPO 2017. Vat tog vir Vroulief saam om
jou op die regte pad te hou. Sy is jou gewete voordat jy te hard aan ‘n
groen trekker se wiele skop en begin voel-voel na daardie tjekboek.
Groete op die Oosgrens! Sien jou op NAMPO.
Kleinneef
E-POSSE
aan Groot neef
Die rommelhoop
Lesers is welkom om ‘n e-pos aan Kleinneef te stuur by .
Mei 2017