SA Graan Maart 2018

114 / 116

112
Beste Grootneefsuid-Afrika het sy eie Bermuda-driehoek waar goed spoor-
loos verdwyn. Die gevaarte van ‘n plek is geleë tussen
Brakpan, Boksburg en Benoni. Van lorries tot mense
verdwyn eenvoudig in die niet. Ook empatie en padreëls
waai daar by die venster uit. Ou Neef, die suiker in jou
koffie en die sein uit jou foon is ook nie veilig nie.
Die paaie wat daarheen lei, is vir enige vlakte-mens van die Vrystaat
een groot kraaines. ‘n Verskrikking van meer karre as pad, met
die gevolg dat die verkeer drupsgewys in die spitstyd aankruie.
Behalwe vir die taxi’s en ander waagmoediges wat links van die geel
sperstreep resies jaag om ‘n entjie verder in te druk.
Ou Neef, so is ek en Buurman na Gauteng om sy suster by die
groot vlieghawe in Johannesburg af te haal. Ons is die oggend vroeg
stad toe, met ons ID-boeke, doopseël en testament toegeknoop in
die linker bo-sak.
Was ons darem bly toe ons op die geverfde vliegtuigies op die pad
afkom: Dit wat soos broodkrummels in Hansie en Grietjie se bos.
Maar helaas, net soos in die storie, lok die ry vliegtuigies op die teer
jou tot in die hok en verdeel dan plotseling in verskeie rigtings met
drop off zones, hotelle en trosse parkeerareas.
Buurman beveel aan dat ons ‘n boom met lekker koelte soek om te
parkeer, maar die knaap agter my ry so op ons, dit lyk of hy agter
óp die Isuzu wil parkeer. Ons mik en meet vir al wat stilhouplek is,
maar die verkeer druk ons dwarsdeur die lughawe tot binne-in ‘n
baan wat sommer net so verdeel na Johannesburg of Pretoria. Nie
een van die twee was ons keuse nie, maar ons druk die bakkie se
neus noorde toe in Pretoria se rigting en sien in die truspieël hoe
die vlieghawe agter ons verdwyn. Dwarsdeur die hele lot sonder
Buurman se suster.
Teen dié tyd sit Buurman meestal met sy oë toe om nie vir Sodom of
Gomorra raak te sien nie. Nou en dan prewel hy iets in hoog Hollands
wat klink soos “hijgend hert der jacht ontkomen”. Dis nou wanneer ‘n
lorrie of ‘n taxi naby ons verbyskuur.
By die eerste afdraai het ons links gewys en regs gedraai, onder deur
‘n brug en terug op ‘n snelweg vlieghawe toe. En weer kry ons die
sylyn met geverfde vliegtuigies om die rigting aan te dui. Buurman
se ferm standpunt was: “Bly nou in jou baan al gaan jy ook staan.”
Ons laat ons deur niemand van koers af boelie nie en haastige jafels
moet maar om ons jaag. Die keer spoeg die verkeer ons uit op ‘n brug
vir baie siek mense. Ons sien eers Terminaal A en toe Terminaal B.
Ons kruie stadig verby en verkyk ons aan al die vreemdes met tasse
en trollies.
Ou Neef, maar wat ‘n mooi gesig begroet ons toe nie! Buurman se
sus met ‘n rooi rok en ‘n beblomde hoed, hande op die heupe en
‘n voet wat op die teer tik, die ene ongeduld oor ons wat haar laat
wag. Ons druk sonder meer die Isuzu se neus op die sypad en
parkeer ‘n halfdosyn Gautengers vas. Buurman druk sy sus dat haar
hoed skuins sit en laai haar saam met hom op die voorste sitplek. Die
suitcase met ‘n handle with care-plakker word staangemaak agterop
die bakkie. Teen dié tyd het ‘n verkeersowerste met ‘n pienk boek
met lang hale aangekom en beduie dat ons die wiele moet laat rol.
Met Buurman en sy sus veilig in die bakkie, vat ons sommer kort-
pad bo-oor die sypad om in ‘n groter baan te kom. Toe waai die
spietkop éérs vir ons. Maar ons is deur ‘n tonnel en onder deur ‘n
brug uit die drukgang, met Buurman wat ons aanmoedig met ‘n
“hou 90 en hou links”.
Die pad terug Vrystaat toe was kort met Buurman se sus wat
vertel het wat sy op haar reis gesien en beleef het. Met die laaste
tolhek agter ons kon ons weer begin asemhaal, want die wye vlaktes
het voor ons gestrek.
Ou Neef, maar toe ons die middag by Buurman se opstal stilhou,
maak ons die ontdekking dat sy sus se tas skoonveld was. Herverdeel
van die bakkie tot in die niet van Gauteng se Bermuda-driehoek
van Brakpan, Boksburg en Benoni.
Ou Neef, daardie middag lees ek in die Volk se blad dat beide
Grace Mugabe en Charlize Theron uit Benoni se geweste is. Ek kon
geen simboliek uit dié toeval raaklees nie. Behalwe dat die plaaslike
driehoek dalk ook vir hul te veel geraak het en hul toe verkas het
– die een na Zimbabwe toe en die ander een tot in Hollywood.
Groete op die Oosgrens.
Kleinneef
E-POSSE
aan Groot neef
Gauteng se Bermuda-driehoek
Lesers is welkom om ‘n e-pos aan Kleinneef te stuur by .
Maart 2018