INLEIDING
V
moes aan die dienste wat aan hulle gelewer is, gemaak word. Die kultuur in die
organisasies moes ook aangepas word. Dit was nie meer dié een wat die hardste
geskree het of die mees dominante by die onderhandelinge was, wat gewen het
nie. Nuwe style en kundigheid moes gevestig word. Dit was nie ’n maklike tyd vir
die leierskap van die organisasies nie. Dit was voorwaar ’n voorreg om in daardie
tye in die raadsale groot te kon word en blootstelling aan so ’n groot transformasie
in ’n ekonomiese sektor te kry.
Graan SA het deur sy eie kwota van aanpassings gegaan en het uiteindelik by die
finale besluit gekom om al die graan- en oliesade-organisasies te amalgameer. Die
fynere besonderhede van die verhaal is meer na die agterkant van hierdie boek
te vind. Selfs vir diegene wat intens by die amalgamasie betrokke was, was daar
hoop dat dit nie weer nodig sal wees nie, maar in 2011 het daar helaas weer ’n
nuwe fase in Graan SA se geskiedenis aangebreek met die leierskap se besluit om
die organisasie te hernu deur na Pretoria te skuif. Die geskiedenis wys ons dat dit
seer sekerlik ook nie die laaste keer sal wees nie. Voortdurende verandering en
vernuwing dui op groei en lewenskragtigheid. Die landbousektor ken die siklusse
van die seisoene en weet ná snoei kom daar weer nuwe vrug. Bang vir verandering
is ons nie, maar dit bly moeilik en gaan nie sonder pyn gepaard nie.
As die grootste produsente-organisasie in Suid-Afrika, moet Graan SA op
allerlei terreine in georganiseerde landbou leiding neem – nie net op
graangebied nie. Dit maak die relevansie van ons lede ’n topprioriteit.
Voedselsekerheid is en bly een van die belangrikste fokusareas van
enige regering en dit maak dat Graan SA altyd polities relevant sal
bly. Ons vermoë en gewilligheid om aan te pas en topgehalte lei-
ding te gee, bepaal ons land se voedselsekerheid en uiteindelik ons
politieke stabiliteit. Stagnasie lei tot dood en daarom vereer ons
die leiers van die vorige en huidige generasie wat die mannemoed
aan die dag gelê het om aanpassings te maak om die graan- en
oliesadeprodusente wat vandag nog volhoubaar op hulle plase is,
daar te hou tot voordeel van almal in Suid-Afrika.
JANNIE DE VILLIERS
Uitvoerende Hoofbestuurder van Graan SA sedert 2011