89 / 92
Gemaklike dubbelkajuit vir harde paaie
– padindrukke: Mahindra Scorpio Pik-Up-dubbelkajuit 4x4
m
ahindra, ‘n voertuigvervaardiger van Indië, is al ‘n
geruime tyd in Suid-Afrika gevestig. Handelaars
is landswyd teenwoordig en onderdele is vrylik
beskikbaar. Al hoe meer Mahindra-voertuie word
veral in die landelike omgewing opgemerk en hul
eienaars is tevrede met die diens en kwaliteit.
Wanneer ‘n nuwe voertuigvervaardiger op die toneel kom, is ‘n mens
maar skepties en versigtig. Die feit is egter dat Mahindra alreeds in
die vyftigerjare voertuie begin bou het en in ag genome dat Indië
ook ‘n oorvloed van rowwe paaie het, kan ‘n mens tot die gevolg-
trekking kom dat Mahindra teen hierdie tyd behoort te weet hoe om
‘n goeie bakkie aanmekaar te sit.
Die nuwe Mahindra Scorpio Pik-Up-dubbelkajuitbakkie, wat nou
ook in Suid-Afrika beskikbaar is, is ‘n voorbeeld van Mahindra se
vaardigheid om ‘n stewige, waarde-vir-geld-voertuig te vervaardig.
Hierdie bakkie val in die klas van die Toyota Landcruiser en Nissan
se Patrol-bakkies. Die Scorpio is egter effens meer kompak en
prysgewys meer bekostigbaar.
Al is hy veel goedkoper as sy Japannese stalmaats, is die Scorpio
tog sterk en stewig en veral die Scorpio Pik-Up Adventure-model
is besonder goed toegerus met die nodige tegnologie om as ‘n be-
troubare 4x4-voertuig te dien.
Alhoewel daar sitplek vir vier passasiers is, is dit nie aan te beveel
dat ‘n mens lang afstande met hierdie voertuig sal aflê met vier
passasiers nie. Net soos die Land Rover Defender 110-dubbelkajuit,
is die Scorpio-dubbelkajuit ook maar knap met spasie vir die agter-
ste insittendes. Vir die twee voorste insittendes is die Scorpio-
dubbelkajuit egter ‘n heerlik gemaklike voertuig. Selfs vir lang
afstande.
Dit is veral die Scorpio se enjin wat beïndruk. Die Mahindra
mHawk 2,179 cc (2,2 liter) viersilinder dieselenjin lewer 88 kW teen
4 000 omwentelinge en het ‘n wringkrag van 280 Nm tussen 1 800 tot
2 800 omwentelinge. Dit is ‘n gesofistikeerde enjin wat maklik die
voertuig tot by 150 km/h kan bring en dit vergelyk met van die
wêreld se beste dieselenjins. Hierdie enjin word in die Scorpio Pik-
Up gekoppel aan ‘n vyfspoed-handratkas. Die amptelike gemiddelde
brandstofsyfer is 8,8 liter per 100 km.
Die Scorpio Pik-Up-modelle kom onder meer met die volgende as
standaard: Ewenaarslot, spoedkontrole, immobiliseerder, klank-
stelsel met ‘n CD- en MP3-speler, volumebeheer op stuurwiel, brand-
vrye sitplekmateriaal, verstelbare stuurwiel, kragstuur, lugreëling,
ABS-remme en 16 duim-wiele. Die Adventure-weergawe word
verder uitgerus met ‘n LA Sport voor- en agterstamper, ‘n snorkel,
dakrak (slegs vir die dubbelkajuit) en allooiwiele.
Scorpio Pik-Ups het ‘n driejaar/100 000 km-waarborg en ‘n drie-
jaar/60 000 km-diensplan. Die enkelkajuit 4x2-weergawe kos
R254 995 en met die Adventurer-pakket kos dit R281 995. Die
dubbelkajuit 4x4 kos R281 995 en sy Adventurer-weergawe kos
R311 995.
GERRIE SMIT,
lid van die SA Motorskrywersgilde
WIELE
vir die plaas
Die Mahindra Scorpio Pik-Up dubbelkajuit 4x4 met die “Adventure”-bykomstighede.
‘n Bakkie wat vir ‘n rowwe lewe kans sien.
87
November 2015