9 / 124
< 7
www.nampo.co.zaNAMPO 2015
Oesdag/Harvest Day
Agter die
NAMPO Oesdag-skerm
Estie de Villiers, redakteur:
SA Graan/Grain
'n
Mens besef nie aldag hoeveel voorbereidings gedoen moet
word voor ‘n groot gebeurtenis soos die Graan SA NAMPO
Oesdag kan plaasvind nie. Met 70 000 plus besoekers en
meer as 650 uitstallers wat verwag word, is dit te verstane
dat daar heelwat beplanning (asook harde werk en sweet!) in
die gebeurtenis ingaan.
Die redaksie het met van die Graan SA-personeel wat nou
betrokke is by die Oesdag gesels om te hoor wat alles agter
die skerms plaasvind. Mnre Johan Loxton (bestuurder: Kom-
mersiële Dienste, Graan SA), Wim Venter (oesdagbeampte:
Graan SA) en Bennie Zaayman (plaasbestuurder: Graan SA)
lig die sluier so effens vir ons lesers.
DIE OESDAGKOMITEE
Elke lid van die Oesdagkomitee, met mnr Cobus van Coller
(dagbestuurslid van Graan SA) as voorsitter, word be-
paalde take/verantwoordelikhede toegedeel. Só word daar
gedurende die Oesdag omgesien na die veeuitstallings, demon-
strasies, die skoonhou van die terrein asook toegangsbeheer.
Verversings is ook ‘n belangrike komponent en al word die
kiosks deesdae op tender toegeken, moet die spyskaarte en
pryse nogtans goedgekeur en gereguleer word om te verseker
dat pryse regoor die terrein gestandaardiseer is.
Verder is die Oesdagkomitee ook verantwoordelik vir die
aanloopbaan en lugverkeerbeheer asook rampbestuur op die
terrein. Die verkeers-, ambulansdienste en polisie word ook
deur die komitee gekoördineer. Gedurende die tydperk wat
die NAMPO Oesdag plaasvind, vergader die Oesdagkomitee
elke oggend om 06:00 – waartydens terugvoer gegee word
en die beplanning vir die dag gedoen word. Dan moet daar
natuurlik ook medianavrae hanteer word, oorsese besoekers
te woord gestaan word en enige versoeke wat uitstallers het,
na omgesien word.
OPGRADERING, UITBREIDING EN INSTANDHOUDING
Die opgradering en uitbreiding van NAMPO Park word vol-
gens ‘n prioriteitslys gedoen. Jaarliks, in Oktober, word die
beplanning aan die Graan SA Dagbestuur vir goedkeuring
voorgelê waarna die werksaamhede op die terrein begin.
Instandhouding word deurlopend gedoen en net voor die
Oesdag in Mei begin, word voorkomende instandhouding ook
gedoen. Dan word die gas- en verkoelingsinstallasies, die ri-
oolstelsel asook boorgate nagegaan en al die elektrisiteits-
voorsieningspunte asook die kragopwekker wat op bystand
is, getoets.
Uitstallers doen ook self reg deur die jaar instandhoudings-
werk op hulle standplase. NAMPO Park is die afgelope
paar jaar met 1 000 m² uitgebrei. Volgens Loxton behoort
die infrastruktuur op die nuwe gedeelte oor die volgende on-
geveer twee tot drie jaar gevestig te word. Daar moes onder
andere twee brûe oor die waterbaan gebou word by die nuwe
kaartjiekantore asook een wat swaarvoertuie kan akkom-
modeer. In Augustus verlede jaar is begin om die pad (van die
nuwe uitbreiding) van die hek af te plavei.
UITSTALLERS
Die aansoeke vir uitstallers vir die volgende NAMPO Oesdag
open reeds 1 Junie – skaars twee weke ná die afgelope Oes-
dag. Uitstallers kan elektronies op die webtuiste aansoek doen
en die kontrakte word in Novembermaand uitgestuur aan
bestaande uitstallers wat weer by die Oesdag wil uitstal en
wel kwalifiseer. Die keuringsproses vir nuwe aansoeke vind in
Januarie en Februarie elke jaar plaas. Uitstallers begin reeds
vanaf die middel van April om hulle werktuie, implemente en
toerusting aan te ry NAMPO Park toe. Alle uitstallers moet
reeds om 14:00 op die Maandag voor die Oesdag begin, met
hulle uitstallings klaar wees.
SEKURITEIT
Gewone patrollies word deurlopend gedurende die jaar op
NAMPO Park gedoen en sekuriteit word reeds drie weke
voor die Oesdag ‘n aanvang neem, opgeskerp en uitgebrei.
Karwagte, as deel van ‘n werkskeppingsinisiatief, word ook
tydens die Oesdag gebruik om Oesdaggangers se voertuie op
te pas.
EN WANNEER DIE HEKKE SLUIT?
Om 17:00, wanneer die hekke sluit, word daar begin om die
sale skoon te maak en te sluit. Die terrein word opgeruim en
enige herstelwerk waar nodig, word afgehandel. Daar word
seker gemaak dat al die besoekers en uitstallers die terrein
verlaat het – slegs die sekuriteitswagte en amptelike perso-
neel word daarna op die terrein toegelaat.
NAVRAE
Enige navrae gedurende die Oesdag kan aan die behulpsame
personeel by die Inligtingstoonbank gestel word. Kyk ook in
die hekprogram – wat gratis by die toegangshekke beskik-
baar is. Hier kan jy presies sien wie wat waar uitstal.
Wim Venter, Johan Loxton en Bennie Zaayman.