12 / 44
Nuwe uitdagings wag
N
a ‘n opwindende drie jaar in die graanbedryf, groet
Graan SA mnr Willem Voogt (bestuurder: Bemarking en
Finansies). Willem keer met ingang van Januarie 2016
terug na Megafreight Services, ‘n internasionale lug- en
seevragagent – hierdie keer in die posisie van adjunk-besturende
direkteur. Sy skuif vorm deel van die plan om die organisasie wat
reeds suksesvol opgebou is, te bevorder en nuwe dinamika aan die
besigheid te gee.
Van toe tot nou
Nadat hy sy BCom Rekeningkunde- en Honneursgraad in Finansiële
Bestuur aan die Universiteit van Pretoria voltooi het, het Willem tot
die logistieke bedryf toegetree en deeltyds by die Chartered Institute
of Management Accountants studeer. Hy het in September 2012 by
Graan SA aangesluit.
“Die ondervinding wat ek by Graan SA opgedoen het, is van
onskatbare waarde. In die werksaamhede van ‘n bedryfsorganisasie
is die waarde van mense in die sukses van die bedryf vir my uitgelig.
So ook die belangrikheid van só ‘n organisasie se werksaamhede in
die breër politieke landskap van Suid-Afrika en sy graanbedryf,” het
Voogt gesê.
“Willem het as jong man by Graan SA ingestap en ons oorweldig met
hope energie, ‘n verstommende kennis van finansies en ‘n begrip vir
die groter prentjie van die graanbedryf. Hy het in ‘n baie kort tydjie
groot respek afgedwing en het ons finansies op ‘n nuwe platform
neergesit,” vertel mnr Jannie de Villiers, uitvoerende hoofbestuurder.
“Willem het groot projekte soos die herkapitalisering van lede in die
Landbou-ontwikkelingsprogram gelei om met eer (‘n skoon oudit) uit
die stryd te tree. Verder het hy die nuutgestigte Bemarkingsafdeling
gelei om ‘n nuwe en innoverende benadering op die proef te stel
en in die proses die rekord invordering van die vrywillige heffing
vir die 2013/2014-oes ook agter sy naam geskryf. Ons gaan hom
beslis mis en weet dat ons nog iewers in die sakewêreld weer van
hom sal hoor. Willem, jy is welkom om ‘n draai by NAMPO te kom
maak vir ‘n koffietjie in die ledelokaal. Mooi loop tot dan!” het
De Villiers afgesluit.
GRAAN SA
ALZENA GOMES,
skakelbeampte: Graan SA
Willem Voogt wat die graanbedryf onlangs vaarwel
geroep het.